هاد الصورة مرسومة على جدران أحد الكهوف في إسبانيا؛ وعمرها ممكن يكون حوالي أربعين ألف سنة، غير الله بارك فيها داكشي علاش باقا حتال دابا.
المهم الصورة داروها واحد الناس، من نوع أخر، ماشي بحالنا سميتهوم الـ"نياندارتالز" Neanderthals ، و هادو نوع منقرض من البشر كتعتابرو بحال خوتنا subspecies ، أولا ولاد عمامنا إلا عتابرناهوم species مستقل، كاينة دراسة أكدت أنهم مستقلين و لكن العلم باقي ماحسمش فهاد القضية.
الطريقة كيفاش رسموا هاد الإدين، كما هو معتقد ، هو أن تضع يدك على الجدار ثم تضع السائل الملون في فمك وتبقى "تبُخ" السائل على إيديك فتتكون مساحة من اللون على الجدار بينها فراغات تمثل شكل الكف ...
قضية فشكال، ظريفة ومسلية، و كتبين أن النياندارتالز ماكان ماعندهوم مايدار. ممكن نسبة البطالة كانت مرتفعة فالشباب ديالهم فبلاسة ما يبرك فالقهاوي إكمي الشيشة و يضر الصحة ديالو، كان كيدوز الوقت ديالو برسم إيديه على الحيوط... بالسيف ماينقارضو.
ماتحكروهومش، راهم كانوا فمستوى ديال الهوموسابيانز( اللي هوما حنا )، و زيد عليه أنه كانت عندهم مخاخ أكبر من مخاخنا. يعني من بين العائلة البشرية كلها متلاقيش غير النياندارتالز اللي جماجمهم أكبر من جماجمنا هادشي اللي حير العلماء كيفاش النياندارتاز انقرضوا و حنا بقينا. يمكن دماغهم بقى يكبر يكبر و عرفوا أن الحياة مشروع فاشل و قالوا أجي ننقارضوا حسن..بقات فالدماغ كبير.
هل حصل تناسل بين النياندارتالز والهوموسابيانز؟ العلماء مالقاوش شي دليل حاسم على هادشي، كانتخيل شي نياندارتال كيغازل فوحدة هوموسابينا و كقول ليها:
هو : آديك الهوموسابيانة، آديك الزوينة؛ آ مولات الجمجمة الصغيرة..
هي : إوا صافي.. أشبغيتي عوتاني ؟
هو : حني علينا شوية ..ولا حنا مانستاهلوش زعما؟
هي : راه منقدرش .. حنا ماكنزوجوش شي وحد من غير species ديالنا..
هو : نقدرو نتزوجوا بالتخبية و تا واحد مايسيق لينا الخبار.
هي : منقدرش يا نياندارتال منقدرش..أنجيب العار لبابا و للspecies ديالنا.
و هكذا فرقت العادات والتقاليد البالية بين الحبيبين:(
يفترض كذلك أن نياندارتالز كانوا كسكنوا فكهوف، و كانوا كيديروا هاد التصاور فالحيوط كمفتاح الكهف، منين كيبغي يدخل الكهف ديالوا كيحط إيدو على الصورة و كاتجي منطبقة و كيتحل الباب. و مني كيكون شي مشكل كيجي المخزن كيتأكد من القياس ديال اليد دالمدعي.
